"Раздарожжа", Міхась Южык

* * *
Дай цябе я патрывожу,
нешта новае скажу.
Хай заззяе раздарожжа,
промень ляжа на мяжу.

Пойдзем разам… Пойдзем разам?
Не журыся, не сумуй.
Гэтым часам, раннім часам
не бывае ў свеце куль.

Толькі з воблачка над лесам
сонца ўсмешка празірне,
пад нагой галінка трэсне,
птушкі голас скалане.

Дай цябе я патрывожу –
цёплым словам на душу.
І павабіць раздарожжа,
промень ляжа на мяжу.